خطوات وتعليمات وتوضيح التقديم لرياض الأطفال (اللغات و المميز)  للعام الدراسي 2022/2023 محافظة الاسكندرية 

بوست توضيحي خاص بالتقديم لرياض الأطفال (اللغات و المميز)  للعام الدراسي 2022/2023 ... 

اولا حندخل علي الرابط ده 👇من متصفح جوجل كروم

من هنا

من هنا

وذلك من يوم الأربعاء الموافق ٢٠٢٢/٦/١ حتى٢٠٢٢/٦/٣٠  

ازاى حنقدم لرياض الاطفال اللغات و المميز؟ 

خطوة خطوة حاقولكم 

بعد ما ندخل علي اللينك السابق

 في كام نقطة حنقراهم جوة الرابط بعدها حندوس على كلمة اوافق على الشروط

حتفتح معاك  صفحة فيها التسجيل ( واحدة للبنين و واحدة للبنات )

حتختار  الصفحة حسب نوع الطفل 

حتبتدى تسجل الاسم  و الرقم القومى و المحافظة و تاريخ الميلاد و  رقم التليفون و الديانة و النوع 

وبعدين نسجل الرغبات وياريت تكون محضر رغباتك فى ورقة قبل ما تبتدى تسجل 

ياريت كمان تستكمل ال ٢٠ رغبة كاملين علشان نفتح فرص اكتر لقبول الطفل 

فى حالة الاكتفاء برغبة واحدة أو عدد من الرغبات ده يعتبر إقرار من حضرتك بعدم رغبتك في باقى الرغبات. 

خلاص استكملنا كل الرغبات واتأكدنا أنها تمام حندوس حفظ  

وحنطبع الاستمارة وحتحتفظ بيها ( ودى خطوة ضرورية جدا لان الاستمارة حتحتاجها سواء فى التقديم الورقى بعد ظهور النتيجة أو لو احتجت تعدل رغباتك) 

بعد ظهور النتيجة إن شاء الله حتتوجه للمدرسة المقبول بها الطفل لاستكمال الملف ودفع المصروفات 

ملحوظة مرفق بالاسفل صور توضح الخطوات

ملاحظات هامة

التقديم علي النت يعني مافيش تقديم ورقي ، مافيش تقديم في المدارس غير لما النتيجة تظهر و تقدم الملف في المدرسة اللي الطفل قبل فيها  ، محتويات الملف حننزلها قبل ظهور النتيجة بفترة وافية

سن التقديم بداية من ٤ سنوات حتى ٦ سنوات إلا يوم و ناخد بالنا كويس و نحسب السن على ١ أكتوبر ٢٠٢٢.

نطبع الاستمارات المرفقة المطلوبة

استمارة الرغبات اللي فيها البيانات و ال ٢٠ رغبة

و الإقرار

و طلب الالتحاق و عليه طابع دعم و طابع مهن نجيبهم بعد م نعرف إن الطفل قبل إن شاء الله 

  طب لو ابنك قدمتله وكان سنه أقل من خمس سنوات ولم يقبل لصغر سنه 

ساعتها حضرتك عندك فرصة العام القادم للتقديم وان شاء الله حيتم قبوله

و التقديم مالوش اى علاقة بضم الإخوة.. القبول بيكون حسب السن والكثافة 

  ما ينفعش نقدم للطفل مرتين لانه بيكون متسجل من اول مرة على السيستم

و ما ينفعش تقدم انجليزي و فرنسي.. حضرتك بتختار نوع واحد فقط منهم

 لو بعد ما عملت الرغبات وحفظتها وطبعتها  غيرت رأيك وعايز تبدل الرغبات أو تعدلها أو تحذفها 

يبقي حضرتك حتحتفظ بورقة الرغبات لحين صدور تعليمات مديرية التعليم بكيفية التعديل

 مين من حقه التعديل أو الحذف فالرغبات 

 ولى الأمر الاب ببطاقته أو من له ولاية تعليمية ويكون معاه ما يثبت

بالنسبة لترتيب الرغبات كل واحد برؤيته حسب مكانه أو ما يناسبه المهم تكتب ال٢٠ رغبة

 مش لازم خالص تستعجلوا ، اسألوا على أماكن و عناوين المدارس و مستواها و كل حاجة علشان ماترجعش تزعل ساعة النتيجة و تقول ياريتني كتبت ، و معانا شهر نقدر نقدم فيه.. ده مستقبل ابنك و أمانة بين أيديك و دي مسئولية حضرتك.